Hysbysiad Preifatrwydd ar gyfer Adeiladu ar gyfer y Dyfodol - Arolwg Rhanddeiliaid a Buddiolwyr

 

Mae Llywodraeth Cymru wedi comisiynu Wavehill i gynnal gwerthusiad o raglen Adeiladu ar gyfer y Dyfodol Llywodraeth Cymru. Nod y gwerthusiad yw dod i ddeall a yw Adeiladu ar gyfer y Dyfodol yn gweithio’n effeithiol wrth gyflawni ei nodau i gynorthwyo gyda’r gwaith o adfer canol trefi ac ardaloedd cyfagos, gan gefnogi strategaeth economaidd ranbarthol neu drefol trwy fynd i’r afael â thir neu adeiladau segur sy’n cael eu tanddefnyddio. Fel rhan o’r gwerthusiad hwn, rydym yn dymuno siarad gyda sefydliadau rhanddeiliaid a buddiolwyr.

 

Mae’r arolwg hwn yn ceisio casglu tystiolaeth a barn gan sefydliadau rhanddeiliaid a buddiolwyr ynglŷn â pha mor dda y mae’r rhaglen wedi cael ei rhedeg, i ba raddau y mae’r rhaglen wedi cyflawni ei nodau, a sut fyddai modd i’r rhaglen esblygu.

 

Bydd y wybodaeth a gesglir yn ystod y prosiect yn cael ei chynnwys mewn adroddiad a gyhoeddir ar wefan Llywodraeth Cymru, a chyhoeddiadau eraill o bosibl, gan Wavehill a Llywodraeth Cymru.

 

Llywodraeth Cymru yw’r rheolydd data ar gyfer y gwaith ymchwil. Fodd bynnag, bydd Wavehill yn dileu unrhyw ddata personol a ddarperir drwy’r cyfweliadau a’r arolygon, ac yn gwneud y data crai yn ddienw cyn ei rannu gyda Llywodraeth Cymru.  

 

Mae cyfranogiad yn gwbl wirfoddol.  Fodd bynnag, mae eich safbwynt a’ch profiadau yn bwysig er mwyn cynorthwyo i ddarparu gwybodaeth ar gyfer polisïau Llywodraeth Cymru.

 

Y cyswllt ar gyfer yr arolwg hwn yn Wavehill yw Oliver Allies.

Rhif Ffôn: 01179 902814

E-bost: Oliver.allies@Wavehill.com 

 

HYSBYSIAD PREIFATRWYDD – AROLWG RHANDDEILIAID

 

Pa fanylion personol sydd gennym ni ac o ble cawsom ni eich manylion?

Diffinnir data personol dan y Rheoliad Cyffredinol ar Ddiogelu Data (GDPR) fel “unrhyw wybodaeth sy’n gysylltiedig ag unrhyw berson y mae modd ei adnabod yn uniongyrchol neu’n anuniongyrchol trwy gyfeirio at unrhyw ffactor sy’n dynodi.”

 

Cafodd eich sefydliad a’ch manylion cyswllt eu hadnabod o ddata a gyflwynwyd i Lywodraeth Cymru fel rhan o’r broses ymgeisio ar gyfer cyllid Adeiladu ar gyfer y Dyfodol, neu drwy adroddiadau cynnydd prosiectau a gyflwynwyd gan sefydliadau buddiolwyr sy’n derbyn cyllid Adeiladu ar gyfer y Dyfodol.

 

Nid yw’r arolwg yn gofyn am gasglu unrhyw ddata personol ychwanegol. Fodd bynnag, os bydd data personol yn cael ei ddarparu mewn ymatebion penagored i gwestiynau, ni fyddwn yn ceisio eich adnabod nac yn cysylltu eich hunaniaeth chi gyda’r ymatebion a roddir.

 

Os byddwch chi’n codi cwestiwn neu gŵyn ac yn darparu data personol yn gofyn am ymateb, bydd yr ymchwilydd yn trosglwyddo’r cais at y swyddog perthnasol yn unig, ac yna yn ei ddileu o ddata’r ymchwiliad.

 

Wrth dderbyn y data crai, bydd unrhyw wybodaeth y mae modd ei adnabod yn cael ei ddileu, a bydd y canlyniadau’n cael eu gwneud yn ddienw.

 

Beth yw’r sail gyfreithlon ar gyfer casglu’r data?

Y sail gyfreithlon ar gyfer prosesu gwybodaeth yn yr ymarfer casglu data hwn yw ein tasg gyhoeddus; sef arfer ein hawdurdod swyddogol i gynnal rôl a swyddogaeth graidd Llywodraeth Cymru.

 

Mae cyfranogiad yn gwbl wirfoddol.  Mae astudiaethau ymchwil fel hyn yn bwysig er mwyn i Lywodraeth Cymru allu casglu gwybodaeth a thystiolaeth y mae modd gweithredu arni ynglŷn â’r gallu i gyflawni blaenoriaethau’r llywodraeth. Er enghraifft, gellid defnyddio gwybodaeth a gasglwyd: 

 

• I benderfynu a oes angen gwneud newidiadau i’r Rhaglen Adeiladu ar gyfer y Dyfodol.

• I benderfynu a ddylai cynlluniau megis Adeiladu ar gyfer y Dyfodol barhau yn y dyfodol

• I ddeall y ffyrdd gorau i Lywodraeth Cymru gynorthwyo i adfywio canol trefi ac ardaloedd cyfagos a chefnogi strategaethau economaidd rhanbarthol neu drefol yng Nghymru.

​

Pa mor ddiogel yw unrhyw ddata personol a gyflwynir?

Mae gwybodaeth bersonol a ddarperir i Wavehill gan Lywodraeth Cymru bob amser yn cael ei storio mewn ‘storfa ddata diogel’ ar weinydd Wavehill. Wrth gwblhau gwaith ymchwil, bydd Wavehill yn defnyddio meddalwedd arolygu sy’n cydymffurfio gyda GDPR ac yn bodloni disgwyliadau Llywodraeth Cymru o ran diogelwch unrhyw ddata a gesglir drwy’r feddalwedd (e.e. bydd yr holl ddata’n cael ei brosesu o fewn y DU). Bydd gwaith papur y prosiect yn cael ei gadw dan glo yn swyddfeydd Wavehill.

 

Nifer fechan o ymchwilwyr sy’n gweithio ar y gwerthusiad yn unig fydd yn gallu defnyddio’r data. Dim ond er mwyn cysylltu â chyfranogwyr at ddiben y gwaith ymchwil y bydd ymchwilwyr Wavehill yn defnyddio eu manylion cyswllt.

 

Mae Wavehill wedi rhoi gweithdrefnau yn eu lle i ymdrin ag unrhyw achos o danseilio rheolau diogelwch data. Os bydd amheuaeth o achos o’r fath, bydd Wavehill yn adrodd hynny i Lywodraeth Cymru, a fydd yn eich hysbysu chi ac unrhyw reoleiddiwr lle bo’n ofynnol i wneud hynny yn ôl y gyfraith. Mae Wavehill yn meddu ar ardystiad Cyber Essentials dilys.

 

Bydd yr holl ddata a gesglir fel rhan o’r gwaith ymchwil hwn yn cael ei adrodd yn ddienw. Ni fydd yn cynnwys eich manylion cyswllt, a bydd unrhyw atebion penagored lle byddai modd eich adnabod yn cael ei dynnu allan. Bydd Wavehill yn defnyddio'r data i lunio adroddiad ar ran Llywodraeth Cymru. Ni fydd yr adroddiad hwn yn cynnwys unrhyw wybodaeth y gellid ei defnyddio i adnabod cyfranogwyr unigol. Yn ogystal, bydd Wavehill yn darparu fersiwn anhysbys o'r set data i Lywodraeth Cymru. Golyga hynny na fydd unrhyw set data’n cynnwys unrhyw wybodaeth lle byddai modd eich adnabod. Yn benodol, bydd eich enw, eich cyfeiriad ac unrhyw fanylion cyswllt eraill yn cael eu dileu o’r data.

​

Am ba hyd fyddwch chi’n cadw unrhyw ddata personol a gyflwynir?

Bydd Wavehill yn cadw data personol yn ystod cyfnod y cytundeb, a bydd unrhyw ddata personol nad yw wedi’i ddileu eisoes o’r ymatebion i’r arolwg yn cael eu dileu tri mis wedi diwedd y cytundeb.

 

Eich hawliau

O dan GDPR, mae gennych chi’r hawliau canlynol mewn perthynas â’r wybodaeth bersonol a ddarperir gennych fel rhan o’r gwerthusiad hwn. Mae gennych chi’r hawl:

 

• I gael mynediad at gopi o’ch data eich hun;

• Gofyn i ni gywiro unrhyw wallau yn y data hwnnw;

• Gwrthwynebu neu gyfyngu ar brosesu (mewn amgylchiadau penodol);

• I’ch data gael ei ‘ddileu’ (mewn amgylchiadau penodol); ac

• I gyflwyno cwyn i Swyddfa’r Comisiynydd Gwybodaeth (ICO), sef ein rheoleiddiwr annibynnol ar gyfer diogelu data.

 

Manylion cyswllt Swyddfa’r Comisiynydd Gwybodaeth yw: Wycliffe House, Water Lane, Wilmslow, Caer, SK9 5AF. Ffôn: 01625 545 745 neu 0303 123 1113.  Gwefan: www.ico.gov.uk

 

Gwybodaeth Bellach

Os oes gennych unrhyw gwestiynau pellach ynglŷn â sut y bydd y data a ddarperir fel rhan o’r astudiaeth hon yn cael ei ddefnyddio gan Lywodraeth Cymru, neu os ydych chi’n dymuno arfer eich hawliau dan y Rheoliad Cyffredinol ar Ddiogelu Data, cysylltwch â:

 

Richard Self (Gwasanaethau Gwybodaeth a Dadansoddi, Llywodraeth Cymru) 

Rhif Ffôn: 03000 256132

E-bost: richard.self1@gov.wales

​

Gellir cysylltu â Swyddog Diogelu Data Llywodraeth Cymru yma: 

 

Llywodraeth Cymru, Parc Cathays, Caerdydd, CF10 3NQ

E-bost: DataProtectionOfficer@gov.wales.