Edrych y tu hwnt i’r sioe: deall effaith ehangach Cymdeithas Amaethyddol Frenhinol Cymru
- Wavehill
- 4 days ago
- 2 min read
Updated: 3 days ago
Rydym yn falch o ddechrau gweithio gyda Chymdeithas Amaethyddol Frenhinol Cymru (CAFC/RWAS) ar waith newydd sy’n edrych ar ei heffaith gymdeithasol ac economaidd.
Mae’r Gymdeithas yn cael ei chysylltu’n agos â’r Sioe Frenhinol, a bydd hynny’n rhan allweddol o’r astudiaeth. Fodd bynnag, mae’r ffocws yn ehangach na hynny. Byddwn yn archwilio ystod lawn yr hyn y mae’r CAFC yn ei wneud drwy gydol y flwyddyn, a’r cyfraniad y mae’n ei wneud at amaethyddiaeth, cymunedau gwledig a’r economi Gymreig yn ehangach. Mae’n effaith sy’n mynd y tu hwnt i faes y sioe, gan gefnogi’r sector, creu cyfleoedd, a helpu i gynnal bywyd gwledig ledled Cymru. Mae’r astudiaeth hon yn ceisio cipio’r darlun ehangach hwnnw, ac yn adeiladu ar bortffolio cynyddol Wavehill o asesiadau effaith gymdeithasol‑economaidd pwrpasol ar draws amrywiaeth o sectorau a sefydliadau.
Dywedodd Aled Jones, Prif Weithredwr Cymdeithas Amaethyddol Frenhinol Cymru:
“Fel elusen sydd â hanes balch yn ymestyn yn ôl i 1904, mae’n bwysig bod gennym dystiolaeth gyfredol o’r effaith rydym yn ei chael heddiw. Er bod digwyddiadau eiconig fel y Sioe Frenhinol a’r Ffair Aeaf yn ganolog i’n gwaith, rydym hefyd yn weithgar drwy gydol y flwyddyn. Gyda dros 11,000 o aelodau ledled Cymru a thu hwnt, rhwydwaith cryf o bwyllgorau cynghori sirol, ac un o’r meysydd sioe gorau yn y DU sy’n gweithredu drwy’r flwyddyn fel canolfan aml‑ddigwyddiad, mae ein cyrhaeddiad yn eang ac amrywiol. Mae’r effaith economaidd yn sylweddol, ond yr un mor bwysig yw ein rôl gymdeithasol a diwylliannol wrth gefnogi amaethyddiaeth a chryfhau lles cymunedau gwledig. Rydym yn falch iawn o weithio gyda Wavehill i ddeall a dangos yn well yr effaith ehangach honno.”
Ychwanegodd Michael Pang, Rheolwr Prosiect yn Wavehill:
“Mae’n wych gallu gweithio gyda’r Gymdeithas ar y gwaith hwn. Mae llawer o gydnabyddiaeth i’r Sioe Frenhinol, ond mae stori lawer ehangach hefyd i’w hadrodd am rôl y mae’r CAFC yn ei chwarae drwy gydol y flwyddyn. Mae’r gwaith hwn yn ymwneud â helpu i ddod â’r stori honno’n fyw.”
